Araw-araw marami pa ring bumibisita sa puntod ni Nora Aunor

Araw-araw marami pa ring bumibisita sa puntod ni Nora Aunor

Araw-araw marami pa ring bumibisita sa puntod ng maalamat na Superstar at National Artist na si Nora Aunor sa Libingan ng mga Bayani. Ito ang ibinahagi ni Lotlot de Leon, isa sa mga anak ni Ate Guy, matapos nilang bisitahin ang puntod ng kanilang yumaong ina kasama ang kanyang mga anak at kapatid.

Ibinahagi ni Lotlot sa kanyang Instagram ang larawan ng kanilang pamilya na kuha sa harap ng puntod ni Nora. Makikita sa larawan si Lotlot kasama ang kapatid niyang si Kiko de Leon, apat na anak na sina Diego, Maxine, Jessica, at Janine Gutierrez, pati na rin ang nobyo ni Janine na si Jericho Rosales.

Pamilya ni Nora Aunor nagpasalamat sa mga bumibisita

“Two days ago we visited mom with her apos and echo and my brother Kiko. Maayos na yung lugar where mom’s at,” ang mensahe ni Lotlot na nagpapakita ng kanilang pagmamahal at pag-alala sa ina. Sa kanilang pagdalaw, napansin nila kung gaano karami ang patuloy na dumadalaw sa puntod ni Nora.

Sinabi pa ni Lotlot, “There are times I wait in the car when I visit her pag maraming tao. And I see how they pay their respects to mom. Salamat sa pagmamahal niyo sa kanya.” Ipinahayag niya ang kanyang taos-pusong pasasalamat sa mga taong hindi nakakalimot at patuloy na nagdadala ng kandila at bulaklak para kay Mommy.

Malinis at maayos na puntod sa Libingan ng mga Bayani

Bukod sa mga bumibisita, pinasalamatan din ni Lotlot ang mga opisyal at staff ng Libingan ng mga Bayani. “Maayos na yung place ng mommy… sobrang linis at ganda. I’m really grateful sa malasakit niyo. Mula sa aking puso, Mahal ko kayo at maraming salamat,” pahayag ng aktres.

Maraming netizens ang naantig at nag-like sa madamdaming post ni Lotlot na nagpapakita ng patuloy na pagmamahal sa yumaong Superstar.

Pagpanaw ni Nora Aunor

Sumakabilang-buhay si Nora Aunor noong Abril 16, sa edad na 71, dahil sa acute respiratory failure. Bagamat wala na siya, nananatili ang kanyang alaala at inspirasyon sa maraming Pilipino, lalo na sa mga taong patuloy na bumibisita araw-araw sa kanyang puntod.