Isang kakaibang pananabik ang bumabalot sa nalalapit na conclave na magpili ng bagong Santo Papa. Sa likod ng mga sikreto at palaisipang proseso, nadagdagan pa ang interes ng mga tao dahil sa Oscar-nominated na pelikulang Conclave, na pinagbidahan ni Ralph Fiennes.
Galing ito sa tanyag na nobela ni Robert Harris noong 2016 na naglalahad kung paano nagtitipon ang mga kardinal mula sa iba’t ibang panig ng mundo sa Sikstina Chapel ng Vatican. Ang kanilang tungkulin? Pumili ng bagong Santo Papa. Habang nagdedesisyon sila sa loob, sabik naman ang madla sa labas. Kapag may napiling bagong lider ng Simbahan, isang puting usok ang lilitaw mula sa tsimenea ng kapilya, hudyat ng bagong kabanata. Magsisimula ang prosesong ito para sa kahalili ni Pope Francis sa Mayo 7.
Ngunit sa likod ng katahimikan, may mga lihim na usapan at pakikipagsabwatan sa mga pasilyo sa labas ng kapilya. Ayon kay Harris, mas kahawig umano ang proseso ng kilalang palabas sa telebisyon, The Traitors.
Sikat ang The Traitors simula noong 2022 sa BBC at nagkaroon na ng iba’t ibang bersyon sa ibang bansa. Dito, sinusubukan ng mga kalahok na tuklasin kung sino sa kanila ang mga “taksil” bago sila tuluyang matatanggal mula sa laro at mawala ang tsansang manalo ng malaking premyo.
Inihalintulad ni Harris ang conclave sa palabas na ito. Aniya, “Biglang nahuhulog ang loob ng lahat sa isang tao—hindi mo maintindihan kung bakit, pero nangyayari.” Dagdag pa niya, “Parang may ganitong dinamika sa conclave kaya madalas itong biglaang maglabas ng sorpresa.”
Pero may aral umano ang proseso para sa mga pampulitikang grupo na naghahanap ng lider. “Kapag sinarado ang pintuan at pinilit na hindi lalabas hangga’t walang desisyon, mas tumitindi ang focus ng lahat,” sabi ni Harris. At sa kanyang pananaliksik, nakita niyang gumagana nang maayos ang ganitong sistema.
Hindi niya nilapastangan ang proseso. Sa halip, nais niyang ipakita kung paano tunay na gumagana ang conclave, isang simulang nagdudulot ng pag-asa at misteryo sa buong mundo.