Ivana Alawi, Muling Nagpaalala: Bumoto ng Tama sa Eleksyon
Muling ipinaalala ng Kapamilya actress at content creator ang kahalagahan ng tamang pagboto sa darating na midterm elections sa Lunes, Mayo 12. Sa kanyang vlog kung saan namigay siya ng pera sa mga palengke vendors, ibinahagi niya ang mga natutunan sa kalagayan ng mga Pilipino.
Ani Ivana, “Ang dami kong realizations matapos gawin ang vlog na ito. Napakamahal ng mga bilihin na talaga. Mataas na ang presyo ng manok, isda, baboy. Sa palengke, minsan wala nang nabebenta dahil kakaunti na ang bumibili.”
Dagdag pa niya, “Lahat talaga ay hirap na hirap. Nakikita natin ang pakikibaka ng mga mangingisda at mga vendors sa palengke.”
Ang Sitwasyon sa Palengke
Ibinahagi rin niya ang kuwento ni Ate Liza, isang tindera na kahit tumigil na ang bentahan, nagbigay pa rin ng libreng isda sa mga kapitbahay. “Wala na siyang nabebenta kaya pinamimigay na lang para hindi masira,” ani Ivana.
Dahil dito, nasaksihan niya ang tunay na hirap ng mga Pilipino sa araw-araw na buhay, lalo na ang pagsusumikap sa gitna ng mataas na presyo.
Panawagan: Huwag Bumoto Dahil Lang Sikat
Sa huli, muling ipinahayag ni Ivana ang kanyang panawagan na maging matalino sa pagboto. “Sana sa darating na eleksyon, mag-isip tayo bago bumoto. Huwag tayo boboto dahil sikat lang. Piliin natin ang mga may tunay na hangaring paunlarin ang bansa.”
Muli niyang pinaalalahanan ang mga botante na suportahan ang mga kandidatong may malasakit at kayang maglingkod ng tapat, mula senador hanggang mayor at kongresista.
“Ikaw, bumoto nang tama. Hindi ako tumatakbo bilang politiko, pero sumusuporta lang ako sa tamang pagbabago,” pagtatapos ni Ivana.
