Pinirmahan ni Pangulong Ferdinand “Bongbong” Marcos Jr. ang bagong batas na nag-aadjust sa buwanang benepisyo ng mga retirado sa Department of Foreign Affairs (DFA).
Ang Republic Act No. 121811, kilala bilang Adjusted DFA Retirement Benefits Act, ay para sa mga retiradong opisyal at empleyado ng DFA na tumatanggap ng buwanang pensyon mula sa Government Service Insurance System (GSIS). Sakop din nito ang mga nag-opt na mag-retire sa ilalim ng Republic Act No. 1616, basta Pilipino sila, umabot na sa 65 taong gulang, at naglingkod ng hindi bababa sa 15 taon sa DFA bago magretiro.
Samantala, ang mga retirado na hindi nakaabot sa mga kwalipikasyong ito ay papailalim pa rin sa mga benepisyong naaayon sa umiiral na mga batas at regulasyon.
Buwanang Pensyon at Gratuity Benefit
Para sa mga retiradong DFA na tumatanggap ng pensyon mula sa GSIS, bibigyan sila ng buwanang pension differential (MPD). Ayon sa batas, ang MPD ay ang pagkakaiba sa pagitan ng na-adjust na buwanang pensyon na kinuwenta ng DFA at ng aktwal na buwanang pensyon mula sa GSIS, na imumultiply sa adjustment factor.
Dahil dito, sa simula ng bisa ng batas, ang adjustment factor ay 50 porsyento. Maaring i-review ito pagkalipas ng limang taon upang masiguro ang pagiging angkop at sustainable ng programa.
Pagpapalabas ng Benepisyo at Pondo
Regular ding rerepasuhin ng DFA ang mga patakaran sa pagkalkula ng MPD para masiguro ang makatwirang implementasyon. Bukod dito, gagawa rin ang DFA ng mga patakaran para sa pamamahagi ng survivorship pension benefits sa mga kwalipikadong dependents ng mga retiradong empleyado.
Ang pondong kailangan para sa benepisyo ay kukunin mula sa mga bayad na nakolekta alinsunod sa Executive Order No. 906, series of 2010.
Sa ganitong paraan, masisiguro ang mas makatarungan at dagdag na suporta para sa mga lingkod-bayan na nagbigay ng mahabang serbisyo sa DFA.