Election-Related Incidents Climb to 40
Umabot na sa 40 ang na-validate na election-related incidents (ERIs) ayon sa Philippine National Police (PNP) nitong Huwebes. Sa pinakahuling ulat hanggang Miyerkules, sinabi ng PNP na 26 sa mga insidente ay may kaugnayan sa karahasan habang 14 naman ang hindi marahas.
Karamihan sa mga violent ERIs ay naitala sa Bangsamoro Autonomous Region in Muslim Mindanao (BARMM) na may walong kaso. Kasunod nito ang Cordillera Administrative Region (CAR) na may pitong insidente.
Rehiyonal na Pamamahagi ng Insidente
Samantala, tatlong violent ERIs ang naitala sa Zamboanga Peninsula, habang dalawa naman sa Cagayan Valley. Isa-isa rin ang na-ulat na violent election incident sa Ilocos Region, Central Luzon, Bicol, Eastern Visayas, Davao Region, at Soccsksargen.
Patuloy naman ang validation ng PNP sa 17 suspected ERIs sa iba’t ibang rehiyon tulad ng Ilocos, Calabarzon, Bicol, Western Visayas, Zamboanga Peninsula, Northern Mindanao, Davao Region, at BARMM.
Mahigit 2,900 naaresto dahil sa Election Gun Ban
Bukod dito, umabot sa 2,923 ang bilang ng mga naarestong lumabag sa election gun ban. Pinakamalaki ang bilang mula sa Metro Manila na may 1,007 na naaresto, sinundan ng Central Visayas na may 380 at Central Luzon na may 360.
Ang mga naaresto ay binubuo ng iba’t ibang sektor kabilang ang 19 na PNP personnel, 18 mula sa Armed Forces of the Philippines, pito mula sa ibang law enforcement agencies, siyam na halal na opisyal, at dalawang appointed government officials. Kasama rin dito ang anim na CAFGU Active Auxiliary, 13 foreign nationals, tatlong kabataang nakasuhan, tatlong suspected communist rebels, 48 security guards, at 2,795 sibilyan.
Mga Narekober na Baril at Iba Pang Kagamitan
Mahigit 3,000 armas ang nakumpiska kabilang ang 1,120 revolver, 841 pistol, 114 gun replicas, 77 explosives, 55 Class A guns, 24 rifles, 22 shotguns, at limang Class B guns, bukod pa sa iba pang mga armas.
Dahil dito, mas mahigpit ang pagbabantay ng mga awtoridad upang mapanatili ang katahimikan habang papalapit ang araw ng eleksyon sa Mayo 12.