Mga grupo ng seafarers humiling sa Korte Suprema na ideklara ang Filipino Magna Carta of Seafarers at ilang bahagi nito bilang labag sa Saligang Batas.
Nagpetisyon ang Concerned Seafarers of the Philippines, International Seafarers Action Center, at tatlong seafarers na sina Joel Almelor, Mark Garcia, at Anecito Lague, na biktima ng pag-atake ng mga Houthi pirates. Dahil dito, hiniling nila na maglabas ang Korte Suprema ng temporary restraining order o writ of preliminary injunction laban sa pagpapatupad ng Magna Carta at mga patakarang kaugnay nito habang tinatalakay ang petisyon.
Isa sa kanilang pangunahing pagtutol ay ang Section 59 ng Magna Carta. Ayon sa bahaging ito, kailangang mag-post ang mga seafarers ng bond bilang kondisyon upang mapatupad ang monetary award habang inaapela o nirerepaso ito. Dahil dito, hiniling nila na ideklarang labag sa Saligang Batas ang naturang probisyon.
Bukod pa rito, nais din nilang ideklara ang buong Magna Carta, kasama na ang mga implementing rules and regulations (IRR) at iba pang kaugnay na kautusan, bilang walang bisa. Anila, nilabag ito ng pamahalaan dahil hindi naaayon sa nakasaad sa Article VI, Section 26(2) at 27(1) ng Saligang Batas.
Humiling din ang mga petitioner na magbigay ang Korte Suprema ng malinaw na gabay ukol sa kapangyarihan ng presidente sa pagdeklara ng public calamity o emergency. Kasama rin dito ang tungkulin ng Kongreso at Bicameral Conference Committee sa pagsunod sa wastong proseso ng paggawa ng batas.
Ang mga respondent sa petisyon ay ang Executive Secretary, Senado, Kapulungan ng mga Kinatawan, Department of Labor and Employment, at Department of Migrant Workers, pati na rin ang iba pang ahensya.
Hanggang sa kasalukuyan, wala pang pahayag mula sa mga respondent hinggil sa isyung ito.