Sa pagdiriwang ng Labor Day, nanawagan ang ilang senador sa gobyerno na bigyan ng disenteng buhay ang mga manggagawa sa Pilipinas. Ayon sa kanila, panahon na upang itaas ang sahod para hindi lamang matugunan ang pangangailangan kundi para mabigyan din ang pamilya ng “marangal na pamumuhay.”
Ani Senator Grace Poe, “Bigyan natin sila ng pagkakataong huminga at maramdaman ang bunga ng kanilang pagsusumikap. Bilang gulugod ng ekonomiya, karapat-dapat ang mga manggagawang Pilipino sa sahod na nagbibigay ng disenteng pamumuhay sa kanilang pamilya.”
Kasama sina Senators Risa Hontiveros, Joel Villanueva, Pia Cayetano, at Juan Miguel Zubiri, muling nanindigan si Poe para sa agarang P100 na pagtaas sa minimum wage. “Sa pagtaas ng presyo, ang dagdag-sahod ay isang napapanahong regalo sa ating mga manggagawa. Hindi makatarungan na lagi silang pilit na naghihigpit ng sinturon,” dagdag pa niya.
Iginiit naman ni Zubiri na kailangang maisabatas ang pagtaas ng sahod, anuman ang magiging halaga—P100 man o P200. “Hindi natin masasabing may umuunlad na ekonomiya kung ang mga nagtatrabaho dito ay patuloy na nabubuhay paycheck to paycheck. Ang tunay na progreso ay mararamdaman sa hapag-kainan, sa paaralan ng mga anak, at sa mga tahanang pinagsusumikapan,” pahayag niya. Idinagdag pa niya na hindi ito usapin ng kagustuhan kundi ng katarungan.
Nanawagan si Hontiveros kay Malacañang na agad ipasa ang wage hike bill bago matapos ang ika-19 Kongreso sa Hunyo 13. “Alam nating kulang pa rin ang P100 at P200 pero ito ay unang hakbang sa sahod na makakabuhay sa mga pamilya. Mas mainam kung maabot ang P1,200 kada araw bilang living wage,” paliwanag niya. Babala niya na kung hindi maipapasa bago matapos ang kongreso, babalik sa simula ang laban para sa sahod.
Sa pagbubukas ng ika-20 Kongreso sa Hulyo 28, tiniyak naman ni Villanueva na ipagpapatuloy nila ang pagsulong ng living wage bilang sukatan ng sahod. Panawagan niya kay Presidente Ferdinand “Bongbong” Marcos na gawing prayoridad ang nasabing bill.
Ipinanukala ni Alan Cayetano ang pagbuo ng Executive-Legislative Labor Commission na magiging tulay ng Kongreso, Ehekutibo, MSMEs, at sektor ng paggawa upang mahanapan ng pangmatagalang solusyon ang isyu sa sahod. “Dito tatalakayin nang malalim ang tunay na halaga ng sahod na sumasaklaw sa mga gastusin ng pamilya tulad ng edukasyon at kalusugan,” paliwanag niya.
Hindi nawala sa usapin ang gender equality. Binanggit ni Pia Cayetano kung paano nahihirapan ang kababaihan sa mababang sahod at dami ng hindi bayad na gawaing bahay. “Isang isyung pangkasarian ito. Ang patas na sahod ay makatutulong na maibsan ang pasaning ito at rumespeto sa kanilang trabaho sa loob at labas ng tahanan,” sabi niya. Hinimok din niyang magkaisa ang lehislatura at ehekutibo para sa “matagal nang hinihintay na ginhawa” ng mga manggagawang Pilipino.
Kasabay nito, nanawagan si Senator Sherwin Gatchalian para sa mabilis na pag-apruba ng repormang Magna Carta para sa mga guro, na layong bigyan sila ng karagdagang benepisyo tulad ng calamity leave at educational allowances.
Sa huli, pinuri nina Senate President Francis Escudero at Senator Bong Revilla ang mga manggagawa sa kanilang dedikasyon na pinanghahawakan ang ekonomiya ng bansa. “Saludo kami sa inyo, sa tibay ng inyong loob at pagmamahal sa pamilya na siyang sandigan ng ating pag-unlad,” sabi ni Revilla.
Sa gitna ng patuloy na pagtaas ng presyo, tanging sahod lang ang pag-asa ng mga Pilipinong manggagawa para sa isang tunay na pagbabago. Panahon na para bigyan sila ng tunay na halaga at pagkilala.
#Senators on Labor Day